اعترافات نائب نادم في البرلمان

اعترافات نائب نادم في البرلمان

قصيدة شعبية بقلم ابو ميس

نـُسجت على منوال (المجرشة) التي أبدعها الملا عبود الكرخي

    
ذبّيتْ روحي اعـْله الحُكـُم      وْادري الحُكُــم ياذيها
  يا وسْفتي  مــا حـَصّلِت     غير النـّدَم  تاليهـــا  
يا وسْفتي بعْت الوطـــن        واصْبَحِتْ عبْد الـدولار
ويّة الحراميّة  صِــــرتْ          تيّار يُضرُبْ  تيّـــار
وآنه ابوســط هالمعمعـة       (صـاير مثل ماشة نار)
ذيابة وْضبـاع اوْ مَچـلبة         والمالكي واويـــها
  
جوگة اذيابة امگطُمــة          والمالكي بيها النّجـم
صاير شريف ابن الچلب       منْ عابتْ الذاك البچم
ايلعْب النفس منْ تنظــره       ماكو عقل بسْ الجسم
اوصاف أبدْ ما تنحچــي         لو ما العيب أحچيـها
  
لمْلوم اجـوْ من كل كُتـُـر      واويّة ترعى ابكل زور
هذا الأجـــة من لنْــدن        او ذاك العُبَرْ سبْع ابحور
او هذا الذي من قـُم  إجــه       ويّاه  جايـب  بعْـرور
فيْلقْ افـاعي   امرقطــــة        والخـامني  امْرَبّيهــا
  
والمشكلة الماتنحچـــي      بالطالباني او شهْبـور
جوگـة حراميّـة كمُـش     طرطور يبعـ.. طرطور
واهـل العمـايم عالْسّره        ومْدافع اعلة الطابـور
كلمنْ ايحود الگـُرصِتــه       نار الفرن يشويــها
  
ومْـنينْ أبدَأ ْ قصّتــي      والقصّة حيْـلْ اطْويلـة
أحداث چَنـْها امصفـّطة      مثل الف ليلة او ليلــة
أعْـترفْ آني اتورّطــتْ     والورطة والله اثگيلــة
لكنْ عسه كلمن قــ           ـراها القصتي يرويـها
  
رشّحني حزب العلقمــي     للبرلمان اعــــوازة
هوسة او گلت خلْ انتفـع    من لـَمّة ْ الهــزازة
مو برلمان البيه رحـِـتْ     لطـّامة عِدْها إجنازة
كل النقاش اعله اللــغف          أولّهـا او تاليهــا
  
ما شفت واحد بيْ نفــع    نـُوّاب نُصها ازبالة
عشرين الف موقف إلــه   يُگلُبْ مثل بدّالــة
أقبض احسابك من دَبـشْ    ويْ جوقة البطالـة
مخبوطة هاي المسألــة   ما ينشُرب صافيهـا
  
عشرين الف موقف إله         دكتـور لكن   باللغُف
من  ينحرِج ما ينفهــم        ينتف شعـر راسه  نتِف
أثول ايوتوت بالحچـــي     يا يابه من هيچي صلف
حسبالك الهوسه الاجـت      هو  الذي   مسوّيهــا
  
حسّيت من أوّل حَــرُفْ      هذا الجَمِعْ أمريكــي
زلمـاي ابن سير النـَعَل      گايد ستيف او ميكي
خشـّــوْا علينه ابعنجهة        يحچون بالتكتيكــي
وتـْبيّن ازبالة (الزِلِـــم)     ذرّة شرَف ما بيهــا
  
خبّـاز أفغاني الاصـــلْ       يحچيلـي بالشـرعية
شـَرْعِيّة! لو كلمَن إله ؟      واللـّغـُفْ بالگونيّـة
وچمالة ابو ناجـي النغلْ      يرگصـلة بالچَفـّيـّة
لو يعلگ العشـْرة شمِعْ       ملعـون ابو ناجيهـا
   

للعودة الى الصفحة السابقة