قصيدة بغداد: للشاعر رمضان علي السليمان
قصيدة بغداد
للشاعر رمضان علي السليمان
يارافع السبع السماء الشديدة ****** يا من بأمره كوّن الكون في كن
وآيات أنزل للعقول الرشيده ****** اللي لكبرها والحشر غـدا تفطن
لمن الجحيم تصيح هل من مزيده ****** تطك الأنام من الوجل سن على سن
وخلاف ذا كال التأنى بنشيده ****** أبيات مثل الجوهر الماس يسون
يرثي بـهــا دار السلام المجيده ****** بغداد دار الـمــعـرفة وموطن الفن
صوتج يعنوان المراجل فجيده ****** جان لزئيرج اشــرس اعداج يذعن
وجنتي بزمانج للأشاوس عجيده ****** وجيوش من ضربات جفج يدبرن
بغــــداد ياســــور العروبة العنيده ****** لازم عليج خيـــول خالـــد يـــردّن
ولازم جيوش الروم ترجع شريده ****** وغربان فوك لشاش منهم يحومن
بغــــداد ياكلب الصمود اووريـده ****** جـــروح اليحبج من نزيفج ينـــزفن
جيــــش الصليبي تايذلّج بعيــده ****** عندج اســـود تخوّف الأنـــس والجن
بغــــداد ماتوفيج اكبـر كصيـــــده ****** ومهما الأقلام من القوافــــي ينظمن
يوفيـج حرن ما نقـــض في وعيده ****** ثابـــت ولا عند المـــواقـــف يجبّـــن
بغـــداد عندي في نهوضـــج عقيــده ****** مهمـــا الليالي أدبـــرن بيـــج وأكفن
ومهما جمع صهيون جثرت عبيده ****** ومهما من اهل الدار ضدج تصهين
بغـــــداد ريت أيام عمرج مـــديـــده ****** وأيـــام عمـــر الخان ملحــج يكــصــرن
ألعــز ابوج وللمفاخــــر حفيـــده ****** امّــــج الغيرة والمجـــــد صـــار لج بن
بغـــداد جيّـات الجحافل اكيـــده ****** يقيـــن ثابــــت كاطــع الشـــك والظـن
ولازم تعود أيام عيشــــج رغيــــده ****** ودجــــله وفرات من الكدر حتم يصفن
بغـــــداد جيشج جاي يصدع رعـيــده ****** وصـــولــة خــيــولـــه بالوغى مايردّن
ضـــربات جيش المسلمين الشـديـدة ****** أللي رميهــن ســــور كافر يهــدّن
بغـــــداد زلمـــج باللّوازم فريــــده ****** وســيوفــهم عند الصحابة مثلهن
تشهد لهن أيام بدر الشديـده ****** يومن اركاب اهل الكفر غصب ذلّن
وصلاة ربي عالنبي الجادت ايده ****** جود السحاب الثكال يومن ينزلن
بأعـــداد مادك الكلب في وريده ****** وبأعداد ما أنفاس راحن وردّن
للأستماع الى القصيدة أو لتحميلها