البارحة بلطيف اجاني الوطن

البارحة بلطيف اجاني الوطن
للشاعر العراقي: عباس جيجان

البارحة شفت الوطن بلطيف اجاني البارحة ..
كتله: شلونك يا موطني يابو الخيول الجامحة؟
كلي: هلا ومية هلا كفتنا هي الراجحة ..

كتله: يا موطني الي يرد لاحضانك الدافية تسامحه؟
كال: ال يرد وال ما يرد وحتى اللي يفكر بلوطن ذنوبه كلهن طايحة ..
بس ال يخون اميته ما يستحق نقرى على روحه الفاتحة ..

كتله: بعد عندي حجي بغزر الدموع المالحة ..
والله عندي حجي يا موطني بغزر الدموع المالحة..
كال: احجي وكول شما كلت طبع الوطن مثل الابو واجب عليك تصارحه ..

كتله: بوية يا موطني ليش انت من دون الدول صاحت عليك الصايحة؟
وليش انت من دون الدول ولك ناسك تصبح نازحة؟
وليش انت من دون الدول جيرانه كلها تواكحه
وليش انت من دون الدول شبابك الحلوين بلدم سابحة ؟
وليش انت من دون الدول يا ثور بلعالم قوي تركض عليه وتناطحه؟
شفته ابتسم لما حجى وجاوبني اجابة واضحة
كلي: كفكف دموعك يا ولد كفتنا هي الراجحة

كتله: يا موطني احنا نبقى ليا وكت نحلم وطنا انصافحه؟
حتى الطيور تهاجر لكن لما يهدها الشوك ترجع طافحة ..
وحتى النخيل الها وطن وما تنزرع الا بارضنا المالحة
كتله يا موطني احنا نبقى اليا وكت نحلم وطنا نصافحة؟
خلاف الوطن خلاف الوطن خلاف الوطن تبقى البشر مثل البهايم دايحة..
و البارحة شفت الوطن بلطيف اجاني البارحة

للعودة الى الصفحة السابقة